शिवताण्डवस्तुतिः

Stotra · 5 verses

देवा दिक्पतय: प्रयात परत: खं मुञ्चताम्भोमुच:
पातालं व्रज मेदिनि प्रविशत क्षोणीतलं भूधरा: ।
ब्रह्मन्नुन्नय दूरमात्मभुवनं नाथस्य नो नृत्यत:
शम्भो: संकटमेतदित्यवतु व: प्रोत्सारणा नन्दिन: ।।1

दोर्दण्डद्वयलीलयाचलगिरिभ्राम्यत्तदुच्चै रव-
ध्वानोद्भीतजगद्भ्रमत्पदभरालोलत्फणाग्रयो्‌रगम् ।
भृङ्गापिङ्गाजटाटवीपरिसरोद्‌गङ्गोर्मिमालाचल-
च्चन्द्रं चारु महेश्वरस्य भवतान्न: श्रेयसे ताण्डवम् ।।2

संध्याताण्डवडम्बरव्यसनिनो भर्गस्य चण्डभ्रमि-
व्यानृत्यद्‌भुजदण्डमण्डलभुवो झञ्झानिला: पान्तु व: ।
येषामुच्छलतां जवेन झटिति व्यूहेषु भूमीभृता-
मुड्डीनेषु विडौजसा पुनरसौ दम्भोलिरालोकिता ।।3

शर्वाणीपाणितालैश्चलवलयझणत्कारिभिः श्लाघ्यमानं
स्थाने सम्भाव्यमानं पुलकितवपुषा शम्भुना प्रेक्षकेण ।
खेलत्पिच्छालिकेकाकलकलकलितं क्रौञ्चभिद्‌बर्हियूनो
हेरम्बाकाण्डबृंहातरलितमनसस्ताण्डवं त्वा धुनोतु ।।4

देवस्त्रैगुण्यभेदात्‌ सृजति वितनुते संहरत्येष लोका-
नस्यैव व्यापिनीभिस्तनुभिरपि जगद्‌व्याप्तमष्टाभिरेव ।
वन्द्यो नास्येति पश्यन्निव चरणगत: पातु पुष्पाञ्जलिर्व:
शम्भोर्नृत्यावतारे वलयफणिफणाफूत्कृतैर्विप्रकर्ण: ।।5

इति शिवताण्डवस्तुति: सम्पूर्णा ।।

More scriptures