पशुपतिस्तोत्रम्

Stotra · 5 verses

स पातु वो यस्य जटाकलापे स्थित: शशाङ्क: स्फुटहारगौर: ।
नीलोत्पलानामिव नालपुञ्जे निद्रायमाण: शरदीव हंस: ।।1

जगत्सिसृक्षाप्रलयक्रियाविधौ प्रयत्नमुन्मेषनिमेषविभ्रमम् ।
वदन्ति यस्येक्षणलोलपक्ष्मणां पराय तस्मै परमेष्ठिने नम: ।।2

व्योम्नीव नीरदभर: सरसीव वीचि-
व्यूह: सहस्रमहसीव सुधांशुधाम ।
यस्मिन्निदं जगदुदेति च लीयते च
तच्छाम्भवं भवतु वैभवमृद्धये व: ।।3

य: कन्दुकैरिव पुरन्दरपद्मसद्म-
पद्मापतिप्रभृतिभिः प्रभुरप्रमेय: ।
खेलत्यलङ्घ्यमहिमा स हिमाद्रिकन्या-
कान्त: कृतान्तदलनो गलयत्वघं व: ।।4

दिश्यात् स शीतकिरणाभरण: शिवं वो
यस्योत्तमाङ्गभुवि विस्फुरदुर्मिपक्षा ।
हंसीव निर्मलशशाङ्ककलामृणाल-
कन्दार्थिनी सुरसरिन्नभत: पपात ।।5

इति पशुपतिस्तोत्रं सम्पूर्णम् ।

More scriptures