मृतसञ्जीवनकवचम्

Name: Mritasanjivana Kavacham
Author: Vasishtha

Vasishtha · Stotra · 29 verses

एवमाराध्य गौरीशं देवं मृत्युञ्जयेश्वरम् ।
मृतसञ्जीवनं नाम कवचं प्रजपेत् सदा ।।1

सारात् सारतरं पुण्यं गुह्याद् गुह्यतरं शुभम् ।
महादेवस्य कवचं मृतसञ्जीवनाभिधम् ।।2

समाहितमना भूत्वा श्रृणुष्व कवचं शुभम् ।
श्रुत्वैतद् दिव्यकवचं रहस्यं कुरु सर्वदा ।।3

जराभयकरो यज्वा सर्वदेवनिषेवित: ।
मृत्युञ्जयो महादेव: प्राच्यां मां पातु सर्वदा ।।4

दधान: शक्तिमभयां त्रिमुख: षड्‌भुज: प्रभु: ।
सदाशिवोऽग्निरूपी मामाग्नेय्यां पातु सर्वदा ।।5

अष्टादशभुजोपेतो दण्डाभयकरो विभु: ।
यमरूपी महादेवो दक्षिणस्यां सदाऽवतु ।।6

खड्‌गाभयकरो धीरो रक्षोगणनिषेवित: ।
रक्षोरूपी महेशो मां नैर्ऋत्यां सर्वदाऽवतु ।।7

पाशाभयभुज: सर्वरत्नाकरनिषेवित: ।
वरुणात्मा महादेव: पश्चिमे मां सदाऽवतु ।।8

गदाभयकर: प्राणनायक: सर्वदागति: ।
वायव्यां मारुतात्मा मां शङ्कर: पातु सर्वदा ।।9

शङ्खाभयकरस्थो मां नायक: परमेश्वर: ।
सर्वात्मान्तरदिग्भागे पातु मां शङ्कर: प्रभु: ।।10

शूलाभयकर: सर्वविद्यानामधिनायक: ।
ईशानात्मा तथैशान्यां पातु मां परमेश्वर: ।।11

ऊर्ध्वभागे ब्रह्मरूपी विश्वात्माऽध: सदाऽवतु ।
शिरो मे शङ्कर: पातु ललाटं चन्द्रशेखर: ।।12

भ्रूमध्यं सर्वलोकेशस्त्रिनेत्रोऽवतु लोचने ।
भ्रूयुग्मं गिरिश: पातु कर्णौ पातु महेश्वर: ।।13

नासिकां मे महादेव ओष्ठौ पातु वृषध्वज: ।
जिह्वां मे दक्षिणामूर्तिर्दन्तान् मे गिरिशोऽवतु ।।14

मृत्युञ्जयो मुखं पातु कण्ठं मे नागभूषण: ।
पिनाकी मत्करौ पातु त्रिशूली हृदयं मम ।।15

पञ्चवक्त्र: स्तनौ पातु उदरं जगदीश्वर: ।
नाभिं पातु विरूपाक्ष: पार्श्वे मे पार्वतीपति: ।।16

कटिद्वयं गिरीशो मे पृष्ठं मे प्रमथाधिप: ।
गुह्यं महेश्वर: पातु ममोरू पातु भैरव: ।।17

जानुनी मे जगद्धर्ता जङ्घे मे जगदम्बिका ।
पादौ मे सततं पातु लोकवन्द्य: सदाशिव: ।।18

गिरीश: पातु मे भार्यां भव: पातु सुतान् मम ।
मृत्युञ्जयो ममायुष्यं चित्तं मे गणनायक: ।।19

सर्वाङ्गं मे सदा पातु कालकाल: सदाशिव: ।
एतत्ते कवचं पुण्यं देवतानां च दुर्लभम् ।।20

मृतसञ्जीवनं नाम्ना महादेवेन कीर्तितम् ।
सहस्रावर्तनं चास्य पुरश्चरणमीरितम् ।।21

य: पठेच्छृणुयान्नित्यं श्रावयेत् सुसमाहित: ।
सोऽकालमृत्युं निर्जित्य सदायुष्यं समश्नुते ।।22

हस्तेन वा यदा स्पृष्ट्वा मृतं सञ्जीवयत्यसौ ।
आधयो व्याधयस्तस्य न भवन्ति कदाचन ।।23

कालमृत्युमपि प्राप्तमसौ जयति सर्वदा ।
अणिमादिगुणैश्वर्यं लभते मानवोत्तम: ।।24

युद्धारम्भे पठित्वेदमष्टाविंशतिवारकम् ।
युद्धमध्ये स्थित: शत्रु: सद्य: सर्वैर्न दृश्यते ।।25

न ब्रह्मादीनि चास्त्राणि क्षयं कुर्वन्ति तस्य वै ।
विजयं लभते देवयुद्धमध्येऽपि सर्वदा ।।26

प्रातरुत्थाय सततं य: पठेत् कवचं शुभम् ।
अक्षय्यं लभते सौख्यमिह लोके परत्र च ।।27

सर्वव्याधिविनिर्मुक्त: सर्वरोगविवर्जित: ।
अजरामरणो भूत्वा सदा षोडशवार्षिक: ।।28

विचरत्यखिलाँल्लोकान् प्राप्य भोगांश्च दुर्लभान् ।
तस्मादिदं महागोप्यं कवचं समुदाहृतम् ।
मृतसञ्जीवनं नाम्ना दैवतैरपि दुर्लभम् ।।29

इति महर्षिवसिष्ठविरचितं मृतसञ्जीवनकवचं सम्पूर्णम् ।

More scriptures