महाकालस्तुति:

Name: Mahakala Stuti
Author: Brahma

Brahma · Stotra · 11 verses

ब्रह्मोवाच

नमोऽस्त्वनन्तरूपाय नीलकण्ठ नमोऽस्तु ते ।
अविज्ञातस्वरूपाय कैवल्यायामृताय च ।।1

नान्तं देवा विजानन्ति यस्य तस्मै नमो नम: ।
यं न वाच: प्रशंसन्ति नमस्तस्मै चिदात्मने ।।2

योगिनो यं हृद:कोशे प्रणिधानेन निश्चला: ।
ज्योतीरूपं प्रपश्यन्ति तस्मै श्रीब्रह्मणे नम: ।।3

कालात्पराय कालाय स्वेच्छया पुरुषाय च ।
गुणत्रयस्वरूपाय नम: प्रकृतिरूपिणे ।।4

विष्णवे सत्त्वरूपाय रजोरूपाय वेधसे ।
तमोरूपाय रुद्राय स्थितिसर्गान्तकारिणे ।।5

नमो नम: स्वरूपाय पञ्चबुद्धीन्द्रियात्मने ।
क्षित्यादिपञ्चरूपाय नमस्ते विषयात्मने ।।6

नमो ब्रह्माण्डरूपाय तदन्तर्वर्तिने नम: ।
अर्वाचीनपराचीनविश्वरूपाय ते नम: ।।7

अचिन्त्यनित्यरूपाय सदसत्पतये नम: ।
नमस्ते भक्तकृपया स्वेच्छाविष्कृतविग्रह ।।8

तव नि:श्वसितं वेदास्तव वेदोऽखिलं जगत् ।
विश्वभूतानि ते पाद: शिरो द्यौ: समवर्तत ।।9

नाभ्या आसीदन्तरिक्षं लोमानि च वनस्पति: ।
चन्द्रमा मनसो जातश्चक्षो: सूर्यस्तव प्रभो ।।10

त्वमेव सर्वं त्वयि देव सर्वं सर्वस्तुतिस्तव्य इह त्वमेव ।
ईश त्वया वास्यमिदं हि सर्वं नमोऽस्तु भूयोऽपि नमो नमस्ते ।।11

इति श्रीस्कन्दमहापुराणे ब्रह्मखण्डे महाकालस्तुति: सम्पूर्णा ।

More scriptures