श्रीकाशीविश्वेश्वरादिस्तोत्रम्

Stotra · 8 verses

नम: श्रीविश्वनाथाय देववन्द्यपदाय ते ।
काशीशेशावतारो मे देवदेव ह्युपादिश ।।1

मायाधीशं महात्मानं सर्वकारणकारणम् ।
वन्दे तं माधवं देवं य: काशीं चाधितिष्ठति ।।2

वन्दे तं धर्मगोप्तारं सर्वगुह्यार्थवेदिनम् ।
गणदेवं ढुण्ढिराजं तं महान्तं सुविघ्नहम् ।।3

भारं वोढुं स्वभक्तानां यो योगं प्राप्त उत्तमम् ।
तं सढुण्ढिं दण्डपाणिं वन्दे गङ्गातटस्थितम् ।।4

भैरवं दंष्ट्राकरालं भक्ताभयकरं भजे ।
दुष्टदण्डशूलशीर्षधरं वामाध्वचारिणम् ।।5

श्रीकाशीं पापशमनीं दमनीं दुष्टचेतस: ।
स्वर्नि:श्रेणिं चाविमुक्तपुरीं मर्त्यहितां भजे ।।6

नमामि चतुराराध्यां सदाऽणिम्नि स्थितिं गुहाम् ।
श्रीगङ्गे भैरवीं दूरीकुरु कल्याणि यातनाम् ।।7

भवानि रक्षान्नपूर्णे सद्वर्णितगुणेऽम्बिके ।
देवर्षिवन्द्याम्बुमणिकर्णिकां मोक्षदां भजे ।।8

इति श्रीकाशीविश्वेश्वरादिस्तोत्रं सम्पूर्णम् ।

More scriptures