हिमालयकृतं शिवस्तोत्रम्

Name: Himalaya Krita Shiva Stotram
Author: Himalaya

Himalaya · Stotra · 14 verses

हिमालय उवाच

त्वं ब्रह्मा सृष्टिकर्ता च त्वं विष्णु: परिपालक: ।
त्वं शिव: शिवदोऽनन्त: सर्वसंहारकारक: ।।1

त्वमीश्वरो गुणातीतो ज्योतीरूप: सनातन: ।
प्रकृति: प्रकृतीशश्च प्राकृत: प्रकृते: पर: ।।2

नानारूपविधाता त्वं भक्तानां ध्यानहेतवे ।
येषु रूपेषु यत्प्रीतिस्तत्तद्रूपं बिभर्षि च ।।3

सूर्यस्त्वं सृष्टिजनक आधार: सर्वतेजसाम् ।
सोमस्त्वं शस्य पाता च सततं शीतरश्मिना ।।4

वायुस्त्वं वरुणस्त्वं च त्वमग्निः सर्वदाहक: ।
इन्द्रस्त्वं देवराजश्च कालो मृत्युर्यमस्तथा ।।5

मृत्युञ्जयो मृत्युमृत्यु: कालकालो यमान्तक: ।
वेदस्त्वं वेदकर्ता च वेदवेदाङ्गपारग: ।।6

विदुषां जनकस्त्वं च विद्वांश्च विदुषां गुरु: ।
मन्त्रस्त्वं हि जपस्त्वं हि तपस्त्वं तत्फलप्रद: ।।7

वाक् त्वं वागधिदेवी त्वं तत्कर्ता तद्‌गुरु: स्वयम् ।
अहो सरस्वतीबीजं कस्त्वां स्तोतुमिहेश्वर: ।।8

इत्येवमुक्त्वा शैलेन्द्रस्तस्थौ धृत्वा पदाम्बुजम् ।
तत्रोवास तमाबोध्य चावरुह्य वृषाच्छिवः ।।9

स्तोत्रमेतन्महापुण्यं त्रिसंध्यं य: पठेन्नर: ।
मुच्यते सर्वपापेभ्यो भयेभ्यश्च भवार्णवे ।।10

अपुत्रो लभते पुत्रं मासमेकं पठेद् यदि ।
भार्याहीनो लभेद् भार्यां सुशीलां सुमनोहराम् ।।11

चिरकालगतं वस्तु लभते सहसा ध्रुवम् ।
राज्यभ्रष्टो लभेद् राज्यं शङ्करस्य प्रसादत: ।।12

कारागारे श्मशाने च शत्रुग्रस्तेऽतिसङ्कटे ।
गभीरेऽतिजलाकीर्णे भग्नपोते विषादने ।।13

रणमध्ये महाभीते हिंस्रजन्तुसमन्विते ।
सर्वतो मुच्यते स्तुत्वा शङ्करस्य प्रसादत: ।।14

इति श्रीब्रह्मवैवर्तमहापुराणे हिमालयकृतं शिवस्तोत्रं सम्पूर्णम् ।

More scriptures