दारिद्रय्‌दहनशिवस्तोत्रम्

Name: Daridrya Dahana Shiva Stotram
Author: Vasishtha

Vasishtha · Stotra · 9 verses

विश्वेश्वराय नरकार्णवतारणाय
कर्णामृताय शशिशेखरधारणाय ।
कर्पूरकान्तिधवलाय जटाधराय
दारिद्रय्‌दुःखदहनाय नम: शिवाय ।।1

गौरीप्रियाय रजनीशकलाधराय
कालान्तकाय भुजगाधिपकङ्कणाय ।
गङ्गाधराय गजराजविमर्दनाय
दारिद्रय्‌दुःखदहनाय नम: शिवाय ।।2

भक्तिप्रियाय भवरोगभयापहाय
उग्राय दुर्गभवसागरतारणाय ।
ज्योतिर्मयाय गुणनामसुनृत्यकाय
दारिद्रय्‌दुःखदहनाय नम: शिवाय ।।3

चर्माम्बराय शवभस्मविलेपनाय
भालेक्षणाय मणिकुण्डलमण्डिताय ।
मञ्जीरपादयुगलाय जटाधराय
दारिद्रय्‌दुःखदहनाय नम: शिवाय ।।4

पञ्चाननाय फणिराजविभूषणाय
हेमांशुकाय भुवनत्रयमण्डिताय ।
आनन्दभूमिवरदाय तमोमयाय
दारिद्रय्‌दुःखदहनाय नम: शिवाय ।।5

भानुप्रियाय भवसागरतारणाय
कालान्तकाय कमलासनपूजिताय ।
नेत्रत्रयाय शुभलक्षणलक्षिताय
दारिद्रय्‌दुःखदहनाय नम: शिवाय ।।6

रामप्रियाय रघुनाथवरप्रदाय
नागप्रियाय नरकार्णवतारणाय ।
पुण्येषु पुण्यभरिताय सुरार्चिताय
दारिद्रय्‌दुःखदहनाय नम: शिवाय ।।7

मुक्तेश्वराय फलदाय गणेश्वराय
गीतप्रियाय वृषभेश्वरवाहनाय ।
मातङ्गचर्मवसनाय महेश्वराय
दारिद्रय्‌दुःखदहनाय नमः शिवाय ।।8

वसिष्ठेन कृतं स्तोत्रं सर्वरोगनिवारणम् ।
सर्वसम्पत्करं शीघ्रं पुत्रपौत्रादिवर्धनम् ।
त्रिसन्ध्यं य: पठेन्नित्यं स हि स्वर्गमवाप्नुयात् ।।9

इति महर्षिवसिष्ठविरचितं दारिद्रय्‌दहनशिवस्तोत्रं सम्पूर्णम् ।

More scriptures