बाणासुरकृतं शिवस्तोत्रम्

Name: Banasura Krita Shiva Stotram
Author: Banasura

Banasura · Stotra · 24 verses

बाणासुर उवाच

वन्दे सुराणां सारं च सुरेशं नीललोहितम् ।
योगीश्वरं योगबीजं योगिनां च गुरोर्गुरुम् ।।1

ज्ञानानन्दं ज्ञानरूपं ज्ञानबीजं सनातनम् ।
तपसां फलदातारं दातारं सर्वसम्पदाम् ।।2

तपोरूपं तपोबीजं तपोधनधनं वरम् ।
वरं वरेण्यं वरदमीड्‌यं सिद्धगणैर्वरै: ।।3

कारणं भुक्तिमुक्तीनां नरकार्णवतारणम् ।
आशुतोष प्रसन्नास्यं करुणामयसागरम् ।।4

हिमचन्दनकुन्देन्दुकुमुदाम्भोजसंनिभम् ।
ब्रह्मज्योतिःस्वरूपं च भक्तानुग्रहविग्रहम् ।।5

विषयाणां विभेदेन बिभ्रन्तं बहुरूपकम् ।
जलरूपमग्निरूपमाकाशरूपमीश्वरम् ।।6

वायुरूपं चन्द्ररूपं सूर्यरूपं महत्प्रभुम् ।
आत्मनः स्वपदं दातुं समर्थमवलीलया ।।7

भक्तजीवनमीशं च भक्तानुग्रहकातरम् ।
वेदा न शक्ता यं स्तोतुं किमहं स्तौमि तं प्रभुम् ।।8

अपरिच्छिन्नमीशानमहो वाङ्मनसो: परम् ।
व्याघ्रचर्माम्बरधरं वृषभस्थं दिगम्बरम् ।
त्रिशूलपट्टिशधरं सस्मितं चन्द्रशेखरम् ।।9

इत्युक्त्वा स्तवराजेन नित्यं बाण: सुसंयत: ।
प्रणमेच्छङ्करं भक्त्या दुर्वासाश्च मुनीश्वर: ।।10

इदं दत्तं वसिष्ठेन गन्धर्वाय पुरा मुने ।
कथितं च महास्तोत्रं शूलिन: परमाद्‌भुतम् ।।11

इदं स्तोत्रं महापुण्यं पठेद् भक्त्या च यो नर: ।
स्नानस्य सर्वतीर्थानां फलमाप्नोति निश्चितम् ।।12

अपुत्रो लभते पुत्रं वर्षमेकं श्रृणोति य: ।
संयतश्च हविष्याशी प्रणम्य शङ्करं गुरुम् ।।13

गलत्कुष्ठी महाशूली वर्षमेकं श्रृणोति य: ।
अवश्यं मुच्यते रोगाद् व्यासवाक्यमिति श्रुतम् ।।14

कारागारेऽपि बद्धो यो नैव प्राप्नोति निर्वृतिम् ।
स्तोत्रं श्रुत्वा मासमेकं मुच्यते बन्धनाद् ध्रुवम् ।।15

भ्रष्टराज्यो लभेद् राज्यं भक्त्या मासं श्रृणोति य: ।
मासं श्रुत्वा संयतश्च लभेद् भ्रष्टधनो धनम् ।।16

यक्ष्मग्रस्तो वर्षमेकमास्तिको य: श्रृणोति चेत् ।
निश्चितं मुच्यते रोगाच्छङ्‌करस्य प्रसादत: ।।17

य: श्रृणोति सदा भक्त्या स्तवराजमिमं द्विज ।
तस्यासाध्यं त्रिभुवने नास्ति किंचिच्च शौनक ।।18

कदाचिद् बन्धुविच्छेदो न भवेत् तस्य भारते ।
अचलं परमैश्वर्यं लभते नात्र संशय: ।।19

सुसंयतोऽतिभक्त्या च मासमेकं श्रृणोति य: ।
अभार्यो लभते भार्यां सुविनीतां सतीं वराम् ।।20

महामूर्खश्च दुर्मेधो मासमेकं श्रृणोति य: ।
बुद्धिं विद्यां च लभते गुरूपदेशमात्रत: ।।21

कर्मदुःखी दरिद्रश्च मासं भक्त्या श्रृणोति य: ।
ध्रुवं वित्तं भवेत् तस्य शङ्करस्य प्रसादत: ।।22

इहलोके सुखं भुक्त्वा कृत्वा कीर्तिं सुदुर्लभाम् ।
नानाप्रकारधर्मं च यात्यन्ते शङ्करालयम् ।।23

पार्षदप्रवरो भूत्वा सेवते तत्र शङ्करम् ।
य: श्रृणोति त्रिसंध्यं च नित्यं स्तोत्रमनुत्तमम् ।।24

इति श्रीब्रह्मवैवर्तमहापुराणे बाणासुरकृतं शिवस्तोत्रं सम्पूर्णम् ।

More scriptures