अन्धककृता शिवस्तुतिः

Name: Andhaka Krita Shiva Stuti
Author: Andhaka

Andhaka · Stotra · 18 verses

अन्धक उवाच

कृत्स्नस्य योऽस्य जगत: सचराचरस्य
कर्ता कृतस्य च तथा सुखदुःखहेतु: ।
संहारहेतुरपि य: पुनरन्तकाले
तं शङ्करं शरणदं शरणं व्रजामि ।।1

यं योगिनो विगतमोहतमोरजस्का
भक्त्यैकतानमनसो विनिवृत्तकामाः ।
ध्यायन्ति निश्चलधियोऽमितदिव्यभावं
तं शङ्करं शरणदं शरणं व्रजामि ।।2

यश्चेन्दुखण्डममलं विलसन्मयूखं
बद्ध्वा सदा प्रियतमां शिरसा बिभर्ति ।
यश्चार्धदेहमददाद् गिरिराजपुत्र्यै
तं शङ्करं शरणदं शरणं व्रजामि ।।3

योऽयं सकृद्विमलचारुविलोलतोयां
गड्गां महोर्मिविषमां गगनात् पतन्तीम् ।
मूर्ध्नाऽऽददे स्रजमिव प्रतिलोलपुष्पां
तं शङ्करं शरणदं शरणं व्रजामि ।।4

कैलासशैलशिखरं प्रतिकम्प्यमानं
कैलासश्रृङ्गसदृशेन दशाननेन ।
य: पादपद्मपरिवादनमादधान-
स्तं शङ्करं शरणदं शरणं व्रजामि ।।5

येनासकृद् दितिसुता: समरे निरस्ता
विद्याधरोरगगणाश्च वरै: समग्रा: ।
संयोजिता मुनिवरा: फलमूलभक्षा-
स्तं शङ्करं शरणदं शरणं व्रजामि ।।6

दग्ध्वाध्वरं च नयने च तथा भगस्य
पूष्णस्तथा दशनपङिक्तमपातयच्च ।
तस्तम्भ य: कुलिशयुक्तमहेन्द्रहस्तं
तं शङ्करं शरणदं शरणं व्रजामि ।।7

एनस्कृतोऽपि विषयेष्वपि सक्तभावा
ज्ञानान्वयश्रुतगुणैरपि नैव युक्ता: ।
यं संश्रिताः सुखभुज: पुरुषा भवन्ति
तं शङ्करं शरणदं शरणं व्रजामि ।।8

अत्रिप्रसूतिरविकोटिसमानतेजा:
संत्रासनं विबुधदानवसत्तमानाम् ।
य: कालकूटमपिबत् समुदीर्णवेगं
तं शङ्करं शरणदं शरणं व्रजामि ।।9

ब्रह्मेन्द्ररुद्रमरुतां च सषण्मुखानां
योऽदाद् वरांश्च बहुशो भगवान् महेश: ।
नन्दिं च मृत्युवदनात् पुनरुज्जहार
तं शङ्करं शरणदं शरणं व्रजामि ।।10

आराधित: सुतपसा हिमवन्निकुञ्जे
धूम्रव्रतेन मनसाऽपि परैरगम्य: ।
सञ्जीवनी समददाद् भृगवे महात्मा
तं शङ्करं शरणदं शरणं व्रजामि ।।11

नानाविधैर्गजबिडालसमानवक्त्रै-
र्दक्षाध्वरप्रमथनैर्बलिभिर्गणौघैः ।
योऽभ्यर्च्यतेऽमरगणैश्च सलोकपालै-
स्तं शङ्करं शरणदं शरणं व्रजामि ।।12

क्रीडार्थमेव भगवान् भुवनानि सप्त
नानानदीविहगपादपमण्डितानि ।
सब्रह्मकानि व्यसृजत् सुकृताहितानि
तं शङ्करं शरणदं शरणं व्रजामि ।।13

यस्याखिलं जगदिदं वशवर्ति नित्यं
योऽष्टाभिरेव तनुभिर्भुवनानि भुङ्क्ते ।
य: कारणं सुमहतामपि कारणानां
तं शङ्करं शरणदं शरणं व्रजामि ।।14

शङ्खेन्दुकुन्दधवलं वृषभप्रवीर-
मारुह्य य: क्षितिधरेन्द्रसुतानुयात: ।
यात्यम्बरे हिमविभूतिविभूषिताङ्ग-
स्तं शङ्करं शरणदं शरणं व्रजामि ।।15

शान्तं मुनिं यमनियोगपरायणं तै-
र्भीमैर्यमस्य पुरुषै: प्रतिनीयमानम् ।
भक्त्या नतं स्तुतिपरं प्रसभं ररक्ष
तं शङ्करं शरणदं शरणं व्रजामि ।।16

य: सव्यपाणिकमलाग्रनखेन देव-
स्तत् पञ्चमं प्रसभमेव पुर: सुराणाम् ।
ब्राह्मं शिरस्तरुणपद्मनिभं चकर्त
तं शङ्करं शरणदं शरणं व्रजामि ।।17

यस्य प्रणम्य चरणौ वरदस्य भक्त्या
स्तुत्वा च वाग्भिरमलाभिरतन्द्रिताभि: ।
दीप्तैस्तमांसि नुदते स्वकरैर्विवस्वां-
स्तं शङ्करं शरणदं शरणं व्रजामि ।।18

इति श्रीस्कन्दमहापुराणे अवन्तीखण्डे अन्धककृता शिवस्तुति: सम्पूर्णा ।।

More scriptures