अनादिकल्पेश्वरस्तोत्रम्

Name: Anadikalpeshvara Stotram
Author: Vasudevananda Sarasvati

Vasudevananda Sarasvati · Stotra · 9 verses

कर्पूरगौरो भुजगेन्द्रहारो गङ्गाधरो लोकहितावह: स: ।
सर्वेश्वरो देववरोऽपघोरी योऽनादिकल्पेश्वर एव सोऽसौ ।।1

कैलासवासी गिरिजाविलासी श्मशानवासी सुमनोनिवासी ।
काशीनिवासी विजयप्रकाशी योऽनादिकल्पेश्वर एव सोऽसौ ।।2

त्रिशूलधारी भवदुःखहारी कन्दर्पवैरी रजनीशधारी ।
कपर्दधारी भजकानुसारी योऽनादिकल्पेश्वर एव सोऽसौ ।।3

लोकाधिनाथ: प्रमथाधिनाथ: कैवल्यनाथ: श्रुतिशास्त्रनाथ: ।
विद्यार्थनाथ: पुरुषार्थनाथो योऽनादिकल्पेश्वर एव सोऽसौ ।।4

लिङ्गं परिच्छेत्तुमधोगतस्य नारायणश्चोपरि लोकनाथ: ।
बभूवतुस्तावपि नो समर्थौ योऽनादिकल्पेश्वर एव सोऽसौ ।।5

यं रावणस्ताण्डवकौशलेन गीतेन चातोषयदस्य सोऽत्र ।
कृपाकटाक्षेण समृद्धिमाप योऽनादिकल्पेश्वर एव सोऽसौ ।।6

सकृच्च बाणोऽवनमय्यशीर्षं यस्याग्रत: सोप्यलभत्समृद्धिम् ।
देवेन्द्रसम्पत्त्यधिकां गरिष्ठां योऽनादिकल्पेश्वर एव सोऽसौ ।।7

गुणान्विमातुं न समर्थ एष वेषश्च जीवोऽपि विकुण्ठितोऽस्य ।
श्रुतिश्च नूनं चलितं बभाषे योऽनादिकल्पेश्वर एव सोऽसौ ।।8

अनादिकल्पेश उमेश एतत् स्तवाष्टकं य: पठति त्रिकालम् ।
स धौतपापोऽखिललोकवन्द्यं शैवं पदं यास्यति भक्तिमांश्चेत् ।।9

इति श्रीवासुदेवानन्दसरस्वतीकृतमनादिकल्पेश्वरस्तोत्रं सम्पूर्णम् ।

More scriptures