श्रीबजरंगबाण

Name: Shri Bajrang Baan
Author: Goswami Tulsidas

Goswami Tulsidas · Bhakti · 36 verses

निश्चय प्रेम प्रतीति ते,
बिनय करैं सनमान ।
तेहि के कारज सकल शुभ,
सिद्ध करैं हनुमान ॥

जय हनुमंत संत हितकारी ।
सुन लीजै प्रभु अरज हमारी ॥1

जन के काज बिलंब न कीजै ।
आतुर दौरि महा सुख दीजै ॥2

जैसे कूदि सिंधु महिपारा ।
सुरसा बदन पैठि बिस्तारा ॥3

आगे जाय लंकिनी रोका ।
मारेहु लात गई सुरलोका ॥4

जाय बिभीषन को सुख दीन्हा ।
सीता निरखि परमपद लीन्हा ॥5

बाग उजारि सिंधु महँ बोरा ।
अति आतुर जमकातर तोरा ॥6

अक्षय कुमार मारि संहारा ।
लूम लपेटि लंक को जारा ॥7

लाह समान लंक जरि गई ।
जय जय धुनि सुरपुर नभ भई ॥8

अब बिलंब केहि कारन स्वामी ।
कृपा करहु उर अंतरयामी ॥9

जय जय लखन प्रान के दाता ।
आतुर ह्वै दुख करहु निपाता ॥10

जै हनुमान जयति बलसागर ।
सुर समूह समरथ भटनागर ॥11

ॐ हनु हनु हनु हनुमंत हठीले ।
बैरिहि मारू बज्र की कीले ॥12

गदा बज्र लै बैरिहिं मारो ।
महाराज प्रभु दास उबारो ॥13

ॐकार हुंकार महाप्रभु धावो ।
बज्र गदा हनु बिलंब न लावो ॥14

ॐ ह्रीं ह्रीं ह्रीं हनुमंत कपीशा ।
ॐ हुं हुं हुं हनु अरिउरसीशा ॥15

सत्य होहु हरि सपथ पाइ कै ।
राम दूत धरू मारू धाइ कै ॥16

जय जय जय हनुमंत अगाधा ।
दुख पावत जन केहि अपराधा ॥17

पूजा जप तप नेम अचारा ।
नहिं जानत हौं दास तुम्हारा ॥18

बन उपबन मग गिरि गृह माहीं ।
तुम्हरे बल हौं डरपत नाहीं ॥19

जय अंजनि कुमार बलवन्ता ।
शंकरसुवन बीर हनुमन्ता ॥20

बदन कराल काल-कुल-घालक ।
राम सहाय सदा प्रतिपालक ॥21

भूत, प्रेत, पिसाच निसाचर ।
अगिन बेताल काल मारी मर ॥22

इन्हें मारू, तोहि सपथ राम की ।
राखउ नाथ मरजाद नाम की ॥23

जनकसुता हरि दास कहावौ ।
ताकी सपथ बिलंब न लावौ ॥24

जै जै जै धुनि होत अकासा ।
सुमिरत होय दुसह दुख नासा ॥25

चरन पकरि, कर जोरि मनावौं ।
यहि औसर अब केहि गोहरावौं ॥26

उठु, उठु, चलु, तोहि राम दुहाई ।
पायँ परौं, कर जोरि मनाई ॥27

ॐ चं चं चं चं चपल चलंता ।
ॐ हनु हनु हनु हनु हनुमंता ॥28

ॐ हं हं हाँक देत कपि चंचल ।
ॐ सं सं सहमि पराने खलदल ॥29

अपने जन को तुरत उबारौ ।
सुमिरत होय आनंद हमारौ ॥30

यह बजरंग-बाण जेहि मारै ।
ताहि कहौ फिरि कवन उबारै ॥31

पाठ करै बजरंग-बाण की ।
हनुमत रक्षा करै प्रान की ॥32

यह बजरंग बाण जो जापैं ।
तासों भूत-प्रेत सब काँपैं ॥33

धूप देय अरु जपै हमेशा ।
ताके तन नहिं रहै कलेसा ॥34

उर प्रतीति दृढ़, सरन ह्वै,
पाठ करै धरि ध्यान ।
बाधा सब हर, करैं सब काम
सफल हनुमान ॥

इति श्रीगोसाईंतुलसीदासजीकृत श्रीहनुमंतबजरंगबाण समाप्त ।

More scriptures